ཕྱི་ལོ་  ༢༠༡༨ ཟླ་ ༣ ཚེས་ ༤ ཉིན་སྔ་དྲོ་དུས་ཚོད་བདུན་པའི་ཐོག་བསོད་སྙོམས་རྒྱུ་འབུལ་གྱི་མཛད་རིམ་དབུ་ཚུགས་ཤིང་།    སྤྱིར་བསོད་སྙོམས་རྒྱུ་འབུལ་གྱི་མཛད་རིམ་ནི་སྔ་ལོ་ལྟར་བདག་ཅག་གི་སྟོན་པ་གཙོ་འཁོར་གསུམ་གྱིས་དབུས་ཐུབ་པས་བཀའ་བསྒོས་ཤིང་བསྟན་པའི་རྒྱལ་མཚན་འཛིན་པའི་འཕགས་པའི་གནས་བརྟན་ཆེན་པོ་ཡན་ལག་འབྱུང་དང་། མ་ཕམ་པ་དང་། ནགས་ན་གནས་པ་ལ་སོགས་གནས་བརྟན་ཆེན་པོ་བཅུ་དྲུག་གི་ཞལ་འབག་དང་ཟ་འོག་ལས་གྲུབ་པའི་ན་བཟའ་སྔ་ལོར་བཅོས་པ་དེ་བཞིན་མནབས་ནས་གནས་བརྟན་རེ་རེའི་མཇུག་ཏུ་ཞལ་ཏ་བ་རེ་དང་གནས་བརྟན་སོ་སོའི་དགྲ་བཅོམ་གྱི་འཁོར་གྲངས་དང་མཐུན་པ་མཚོན་ཕྱིར་དགྲ་བཅོམ་བརྒྱ་ཕྲག་རེར་དགེ་སློང་རེ་རེའི་གྲངས་ཀྱིས་མཚོན་པར་བྱས་ཏེ་གནས་བརྟན་རང་རང་གི་དགྲ་བཅོམ་གྱི་འཁོར་གྲངས་དང་མཐུན་པའི་བར་དུ་གནས་བརྟན་རེ་སྟེ་ཡོངས་བསྡོམས་དགེ་སློང་བརྒྱ་དང་བདུན་ཅུ་ཙམ་དང་དགེ་སློང་མ་བཅུ་ཕྲག་ལ་ཉེ་བ་རྣམས་རེ་རེ་བཞིན་བསོད་སྙོམས་ལ་བྱོན་བཞིན་པ།