ཕྱི་ལོ་ ༢༠༢༠ ཟླ་ ༡ ཚེས་ ༣༠ ཉིན།
ཚོགས་ཡུལ། སྨོན་ལམ་ཆོས་རྭ།
དུས་ཡུན། ཕྱི་ལོ་ ༢༠༢༠ ཟླ་ ༡ ཚེས་ ༤ ནས་ ༣༠ བར།

ལོ་ལྟར་བཀའ་བརྒྱུད་སྨོན་ལམ་ཆེན་མོ་དབུ་མ་ཚུགས་པའི་གོང་རོལ་དུ་ཆོས་སྤྱོད་ཚན་པའི་མཆོད་གཡོག་སྡེ་ཚན་ནས་ཟླ་བ་གཅིག་ལྷག་རིང་གཏོར་མའི་མཆོད་རྗས་རྣམས་བཞེངས་སྲོལ་མཆིས། ད་ལན་བཀའ་བརྒྱུད་སྨོན་ལམ་ཐེངས་ ༣༧ པར་རྒྱ་བལ་འབྲུག་གསུམ་གྱི་ཀར་དགོན་ཁག་ནས་ཕེབས་པའི་ བཙུན་མའི་ཞལ་གྲངས་ ༡༤ དང་། རབ་བྱུང་བའི་ཞལ་གྲངས་ ༥༣ སྟེ་ཁྱོན་བསྡོམས་གྲྭ་བཙུན་ ༦༧ ནས་ མཉམ་ཞུགས་མཛད་ནས་རྒྱས་སྤྲོས་ལྡན་པའི་གཏོར་རྒྱན་བཟོ་བསྐྲུན་ལེགས་པར་བགྱིས་ཡོད།

སྤྱིར་བཏང་ད་བར་མཆོད་གཡོག་གཞོན་པ་རྣམས་ཀྱིས་སྨོན་ལམ་སྐབས་མཆོད་པའི་བླ་གཏོར་སོགས་ཀྱི་ཕྱོགས་བཞིར་བརྒྱན་པའི་མཆོད་པའི་རྫས་ཀྱི་རྒྱན་རྣམས་བཟོ་བསྐྲུན་འགན་བཞེས་གནང་མུས་ཀྱང་། འདི་ལོར་དམིགས་བསལ་མཆོད་དཔོན་འོད་གསལ་སྙིང་པོ་གཙོས་མཆོད་དཔོན་བསོད་ནམས་རིན་ཆེན་དང་། མཆོད་དཔོན་ཀརྨ་བསམ་གཏན་དང་། མཆོད་དཔོན་ཀརྨ་དབང་ཕྱུག་བཅས་ཀྱིས་ལམ་སྟོན་འོག་མཆོད་ གཡོག་གཞོན་པ་རྣམས་ཀྱིས་མཆོད་པའི་སྐུ་རྟེན་གཙོ་བོ་རྣམས་ལེགས་པར་བཞེངས།

སྙིགས་ལྔའི་རང་མདངས་ཆེས་ཆེར་བདོ་བས་འཛམ་གླིང་གང་སར་འབྱུང་བཞིའི་གནོད་འཚེ་དང་ནད་ཡམས་སོགས་ཀྱི་གོད་ཆག་ཤུགས་ཆེ་བྱུང་དང་འབྱུང་བཞིན་པར་བརྟེན། དེ་ལྟའི་འཇིགས་པ་མ་ལུས་ཞི་བའི་ཕྱིར་ སྨོན་ལམ་མཆོད་པའི་སྐུ་རྟེན་གཙོ་བོར་ཐུབ་པ་རིགས་དྲུག་སྟེ། ལྷའི་ཐུབ་པ་བརྒྱ་བྱིན་ནི་ལྷ་རྣམས་ལ་ཆོས་ཀྱི་སྡོམ་བཞི་སྒྲོགས་ཕྱིར་པི་ཝང་གི་ཕྱག་མཚན་འཛིན་པ། ལྷ་མ་ཡིན་གྱི་ཐུབ་པ་ཐགས་བཟང་རིས་ནི་ལྷ་མ་ཡིན་རྣམས་འཐབ་རྩོད་ལས་འདུལ་བའི་མཚོན་བྱེད་དུ་ཕྱག་ མཚན་དུ་གོ་མཚོན་ཐོགས་པའི་སྣང་བརྙན་དང་།
མིའི་ཐུབ་པ་ཤཱཀྱ་སེང་གེ་ནི་མི་རྣམས་ལ་ཐོག་མཐའ་བར་གསུམ་དུ་དགེ་བའི་ཆོས་འབའ་ཞིག་སྟོན་པའི་མཚོན་བྱེད་དུ་འཁར་གསིལ་དང་ལྷུང་བཟེད་ཀྱི་ཕྱག་མཚན་བསྣམས། བྱོལ་སོང་གི་ཐུབ་པ་སེང་གེ་རབ་བརྟན་ནི་བྱོལ་སོང་ཀུན་གླེན་ལྐུགས་ཀྱི་མདུད་པ་ལས་འགྲོལ་ཕྱིར་ཕྱག་མཚན་དུ་པོ་ཏི་ཐོགས་པའི་སྣང་བརྙན་དང་། དེ་བཞིན་ཡི་དྭགས་ཀྱི་ཐུབ་པ་ཁ་འབར་ནི་ཡི་དྭགས་རྣམས་བཀྲེས་སྐོམ་གྱི་གདུང་བ་ལས་སྒྲོལ་སླད་ཕྱག་མཚན་དུ་རིན་པོ་ཆེའི་སྒྲོམ་བུ་ཐོགས་པ། དམྱལ་བའི་ཐུབ་པ་གཤིན་རྗེ་ཆོས་ཀྱི་རྒྱལ་པོ་ནི་དམྱལ་བའི་ཚ་གྲང་གི་གདུང་བ་ལས་ཞི་ཕྱིར་ཕྱག་མཚན་དུ་ མེ་ཆུ་ཐོགས་པའི་སྐུ་རྟེན་ལྟ་ན་སྡུག་ཅིང་ཡིད་འཕྲོག་པའི་དཔལ་དང་ལྡན་པར་བཞེངས་བསྐྲུན་མཛད་འདུག།

༡) མཆོད་གཡོག་གསར་བུ་བ་ཞིག་ནས་སྟོན་པའི་སྐུ་བརྙན་བཅའ་བཞིན་པའི་བརྙན་པར།།

༢) རབ་བྱུང་ཞིག་ནས་པད་གདན་ལེགས་པར་བཅའ་བཞིན་པ།

༣) གཏོར་གཞོང་ནང་འཁོར་ལོ་དང་དུང་དཀར་སོགས་མཆོད་རྫས་སྣ་ཚོགས་པའི་རི་མོས་བརྒྱན་པའི་དཀར་རྒྱན་བཅའ་བཞིན་པ།

 ༤) མཆོད་གཡོག་ཞིག་གིས་ཐུབ་པའི་སྙན་ཀོར་ཐད་ཀྱི་སྟོང་ཆ་རྣམས་འགེངས་བཞིན་པ།

༥) བྱང་རྩལ་གྱི་ཚད་གཞི་འདི་ཙམ་སོན་པར་ལོ་ཡུན་དུ་མའི་རིང་སྦྱོང་བརྡར་བྱེད་དགོས་པ་ཡིན།

༦) མཆོད་བཞེངས་ཀྱི་བྱ་བར་ཞུགས་ཕྱིར་བཟོད་བསྲན་དང། དོ་སྣང་། ལས་ལ་འཇུག་འདོད་ཀྱི་སྤྲོ་བ་བཅས་ཤིན་ཏུ་གནད་ཆེ།

༧) གཏོར་མ་བཅའ་བའི་ཡོ་བྱད་རྣམས་འབྲུག་ཡུལ་ནས་ཐོན་པའི་དམིགས་བསལ་ཤིང་རིགས་ཤིག་སྟེ། དེ་ཉིད་ཀྱི་སྟེང་མར་མི་འགོ་བའི་ཁྱད་ཆོས་ལྡན་པ་ཡིན།

༨) གཏོར་གཞོང་ཞིག་གི་ནང་བཀྲ་ཤིས་རྫས་བརྒྱད་ཀྱི་རྣམ་གྲངས་ཆ་ཚང་བའི་བརྙན་པར་ཁེར་རྐྱང་ཞིག །

 ༩) འདི་ཉིད་བོད་བརྒྱུད་ནང་བསྟན་གྱི་གནའ་སྲོལ་སྒྱུ་རྩལ་ཁྱད་པར་ཅན་ཞིག་ཡིན་ཡང་དེང་དུས་ཀྱི་ཆ་རྐྱེན་གང་འཚམས་ཡོད།

 ༡༠) མར་རྒྱན་གྱི་རྒྱན་སྤྲོས་རྣམས་བཞུ་བའི་ཉེན་ལས་སྐྱོབ་ཕྱིར་སྲབ་ཤོག་ཁྱད་པར་ཅན་ཞིག་ལོངས་སྤྱོད་པ་ཡིན།

 ༡༡) བརྙན་པར་ནང་མཆིས་པ་འདི་དག་ལ་ཞལ་ཟས་ཞུ་བ་ཡིན།

༡༢) ཞལ་ཟས་རྣམས་བརྐོས་རིས་ཀྱིས་བརྒྱན་པའི་ཤིང་སྟེགས་སྟེང་བཞག་སྟེ། བཙུན་མ་རྣམས་ནས་ཞལ་ཟས་ཀྱི་རྩ་བར་དཀར་རྒྱན་གྱིས་བརྒཡན་བཞིན་པའི་བརྙན་པར།

༡༣) ཞལ་ཟས་ཀྱི་མཛེས་རྒྱན་དུང་དཀར་གཡས་འཁྱིལ་གྱི་གཟུགས་བརྙན་ཡོངས་སུ་རྫོགས་པས་བརྒྱན་པའི་བརྙན་པར།

༡༤) ཞལ་ཟས་ཀྱི་མཛེས་རྒྱན་ཕྱིར་མཆོད་ཏིང་ནང་འགིའུ་ཝང་བཤམས་པའི་དཀར་རྒྱན་ཡིད་དབང་འགུགས་པ་ཞིག། །

 ༡༥) ཞལ་ཟས་ཀྱི་བཀོད་པ་ཡོངས་སུ་གྲུབ་པའི་བརྙན་པར་ཞིག།།

 ༡༥) འདྲེན་པ་སྣང་བ་མཐའ་ཡས་ཀྱིས་ལྷུང་བཟེད་བཟུང་བའི་སྐུ་བརྙན་ཞིག །

 ༡༧) རྒྱན་ཁྲ་འདི་ཉིད་ཤིང་གི་སྟེང་དུ་དཀར་རྒྱན་གྱི་མཛེས་བརྐོས་ཕུན་སུམ་ཚོགས་པ་ཞིག་ཡིན།

༡༨) དཀར་རྒྱན་གྱི་རྣམ་གྲངས་རེ་རེ་བཞིན་འདུས་ཏེ་མཆོད་བཞེངས་པས་རྒྱན་བཀྲའི་སྟེང་འགོད་བཞིན་པ།

༡༩) མཛེས་སྡུག་གི་དཔལ་ཕུན་སུམ་ཚོགས་པས་གཏམས་པའི་རྡོ་རྗེ་འཆང་གི་སྐུ་བརྙན་ངོ་མཚར་ཅན།