དཔལ་༸རྒྱལ་དབང་ཀརྨ་མཆོག་གིས་ཕྱི་ལོ་  ༢༠༠༤  ལོ་ནས་བཀའ་བརྒྱུད་སྨོན་ལམ་གྱི་ཐུགས་འགན་ཐོག་མར་བཞེས་སྐབས། རང་རེ་སྒྲུབ་བརྒྱུད་པ་ཀུན་གྱི་མེས་པོ་རྗེ་མར་མི་དྭགས་གསུམ་གྱི་སྣང་བརྙན་གཏོར་མའི་གཟུགས་སུ་ཐོག་མར་བཞེངས་སྐྲུན་མཛད་པ་ནས་བཟུང་ལོ་རེ་བཞིན་བཀའ་བརྒྱུད་སྨོན་ལམ་སོ་སོར་བསྟན་འགྲོར་མཛད་རྗེས་བླ་ན་མེད་པའི་གངས་ལྗོངས་ཅན་ལྗོངས་ཀྱི་སྐྱེས་ཆེན་ཀུན་གྱི་སྐུ་བརྙན་དང་ཡི་དམ་ཆོས་སྲུང་ཁག་གི་སྐུ་བརྙན་གཏོར་མའི་ནང་བཞེངས་པའི་ལམ་སྲོལ་གསར་གཏོད་མཛད་པའི་རྒྱུན་ད་ལྟ་བར་མུ་མཐུད་སྐྱོང་བ་ལྟར། འདི་ལོ་བཀའ་བརྒྱུད་སྨོན་ལམ་སོ་ལྔ་པའི་སྐབས་ཀྱི་རྒྱན་གཏོོར་ནི་ཉེ་བའི་སྲས་ཆེན་བརྒྱད་ནི། འཇམ་དབྱངས། སྤྱན་རས་གཟིགས། ཕྱག་ན་རྡོ་རྗེ། བྱམས་པ། ཀུན་ཏུ་བཟང་པོ། ས་ཡི་སྙིང་པོ། སྒྲིབ་པ་རྣམ་སེལ། ནམ་མཁའི་སྙིང་པོ་སྟེ་བརྒྱད་དང་། དབུས་སུ་སྒྲུབ་བརྒྱུད་ཤིང་རྟ་བརྒྱད་ནི། སྔ་འགྱུར་རྙིང་མ། ཇོ་བོ་བཀའ་གདམས་པ། ལམ་འབྲས་པ། མར་པ་བཀའ་བརྒྱུད། ཤངས་པ་བཀའ་བརྒྱུད། ཞི་བྱེད་པ། སྦྱོར་དྲུག་པ། རྡོ་རྗེ་གསུམ་གྱི་བསྙེན་སྒྲུབ་སོ་སོའི་བསྟན་བདག་བླ་མ་རྣམས་ཀྱི་སྣང་བརྙན་བཅས་ཡོད།  དེ་བཞིན་གཤམ་དུ་བཀྲ་ཤིས་ལྷ་མོ་བརྒྱད་ཀྱི་སྐུ་བརྙན་བཅས་ཡོད།