གནས་མཆོག་རྡོར་གདན། བཀའ་བརྒྱུད་སྨོན་ལམ་ཆོས་ར།

ཕྱི་ལོ་ ༢༠༢༠ ཟླ་བ་ ༡ པའི་ཚེས་ ༢༨ ནས་ ༣༠ བར་ཉིན་གསུམ་རིང་། ལོ་ལྟར་སྨོན་ལམ་མ་ཚུགས་པའི་སྔོན་དུ་བཀའ་བརྒྱུད་སྨོན་ལམ་ཆོས་རར་རྒྱ་བལ་འབྲུག་གསུམ་གྱི་དགེ་བཙུན་རྣམས་ཀྱི་སྔོན་འགྲོའི་སྤྱོད་ལམ་རྒྱུགས་བཞེས་སླད། གཟུ་དཔང་མཛད་པོ་གདན་ས་རུམ་བཏེག་བཤད་གྲྭའི་མཁན་པོ་ཀར་བསྟན་དང་། གདན་ས་དཔལ་སྤུངས་ཤེས་རབ་གླིང་གི་ མཁན་པོ་ཐུབ་བསྟན་ཀརྨ། གདན་ས་རིག་པའི་རྡོ་རྗེའི་གཙུག་ལག་སློབ་གཉེར་ཁང་གི་མཁན་པོ་ནོར་བུ་རྒྱལ་མཚན། བན་ཆེན་དགོན་གྱི་མཁན་པོ་ བསོད་ནམས་འགྱུར་མེད། ཁྲ་འགུ་དགོན་གྱི་མཁན་པོ་ཆོས་རྒྱལ། བཅས་འདི་ལོར་སྤྱོད་ལམ་རྒྱུགས་བཞེས་ལ་ཕེབས་མཁན་དགོན་སྡེ་ཁག་ཉེར་ བཞི་པོ་རྣམས་ཉིན་གསུམ་རིང་སྤྱོད་ལམ་རྒྱུགས་བཞེས་ལེགས་པར་བསྐྱངས།

དེ་ཡང་སྡེ་ཚན་རྣམ་པ་ལྔའི་སྒོ་ནས་རྒྱུགས་བཞེས་མཛད་དེ། སྡེ་ཚན་ལྔ་ནི་ཐོག་མར་ན་བཟའ་མནབ་ཚུལ། གཉིས་པར་ཕྱག་འཚལ་ཚུལ། གསུམ་ པར་འགྲོ་འདུག་གཉིས། བཞི་པར་ན་བཟའ་ཇི་ལྟར་ལྟེབ་ཚུལ།
ལྔ་པར་གྲངས་དང་དུས་ཏེ་རྣམ་པ་ལྔའི་སྒོ་ནས་རེ་རེ་བཞིན་གོང་གསལ་དགོན་ཁག་ རྣམས་ཀྱི་རྒྱུགས་བཞེས་མཛད་དེ། ཐོག་མར་དགེ་སློང་རྣམས་ཀྱི་ཆོས་གོས་རྣམ་གསུམ་མནབ་ཚུལ་དང་ལྟེབ་ཚུལ། གདིང་བ་ཁ་སྒྱུར་ཚུལ། སྐུ་ ཕྱག་འབུལ་ཚུལ། གསོལ་ཚིགས་བཞེས་ཚུལ། ཚོགས་སུ་ཕེབས་བཞུགས་མཛད་ཚུལ། དབུ་ཞྭ་མནབ་ཚུལ། རྒྱལ་བའི་བཀའ་ འགྱུར་རིན་པོ་ ཆེ་ཆོས་སྐོར་དུ་གདན་འདྲེན་སྐབས་གོམ་སྟབས་དལ་ལྷོད་ཇི་ལྟར་འདོར་ཚུལ་བཅས་ཀྱི་སྤྱོད་ལམ་རྒྱུགས་བཞེས་ཡོངས་རྫོགས་རིམ་བཞིན་ བཞེས། དེ་བཞིན་དགེ་སློང་རྣམས་ཀྱི་རྒྱུགས་བཞེས་གྲུབ་མཚམས་དགེ་ཚུལ་རྣམས་ཀྱི་སྤྱོད་ལམ་ཡང་དེ་བཞིན་དུ་རེ་རེ་བཞིན་རྒྱུགས་བཞེས་ མཛད། དེ་ཡང་དུས་ཡུན་མགྱོགས་བུལ་གྱི་ཚད་གཞི་ཆུ་ཚོད་ཀྱི་དུས་བཀག་ཐོག་གྲ་སྒྲིག་གང་ལེགས་དང་རྒྱུགས་སྤྲོད་ཕུལ་ཕྱིན་རྣམས་ལ་བཀའ་བརྒྱུད་ སྨོན་ལམ་གྱི་ཉིན་མཐའ་མར་བྱ་དགའ་གསོལ་རས་སྩལ་རྒྱུའི་གཏན་འབེབས་མཛད་པ་ལྟར་སྩལ་རྒྱུ་ཡིན་འདུག །

༡) དགེ་ཚུལ་གསར་བུ་བ་ཞིག་ནས་ལག་གཉིས་སྤྱི་བོར་བཞག་སྟེ་ཕྱག་འཚལ་ཚུལ་གྱི་རིམ་པ་དང་པོའི་ལམ་སྟོན་བགྱིད་བཞིན་པ།

༢) ལག་ཟུང་མགྲིན་པར་སྦྱར་བ་སྟེ་ཕྱག་འཚལ་ཚུལ་གྱི་རིམ་པ་གཉིས་པ།

༣) རབ་བྱུང་ཞིག་ནས་པུས་བཙུགས་ཀྱི་སྒོ་ནས་ཕྱག་འཚལ་བའི་སྟངས་སྟབས།

 ༤) གྲྭ་བཙུན་རྣམས་ནས་ཚོགས་དང་གསུང་ཆོས་ཞུ་སྐབས་ཆོས་གོས་ངེས་པར་མནབ་དགོས།

༥) ཆོས་གོས་མནབ་བཞིན་པ། 

 ༦) ཆོས་གོས་ཇི་ལྟར་ཕུད་ཚུལ།

༧) གྲྭ་བཙུན་ཐུན་མོང་ནས་རང་ཉིད་གང་དུ་སྡོད་འདོད་པའི་ས་གཞིར་གདིང་བ་འདིངས་བཞིན་པ།

 ༨) གྲྭ་བཙུན་རྣམས་ལ་གསོལ་ཇ་འབུལ་བཞེས་སྐབས་བཞེས་ཕོར་ལག་གཉིས་ཀྱི་བར་དུ་བཟུང་ཞིང་ཡོན་བསྔོའི་བཟླས་བརྗོད་སྐབས་བཞེས་ ཕོར་ཅུང་ཟད་འདེགས་དགོས།

༩) ཚོགས་དང་གསུང་ཆོས་སྐབས་གྲལ་དུ་ཇི་ལྟར་འདུག་ཚུལ། 

 ༡༠) དགེ་སློང་རྣམས་ལ་རྒྱུགས་བཞེས་ཀྱི་རྣམ་གྲངས་མང་ཞིང་དཀའ་བ།

 ༡༡) དགེ་སློང་རྣམས་ནས་ཆོས་གོས་སྟེང་སྣམ་སྦྱར་མནབ་དགོས།

 ༡༢) སྣམ་སྦྱར་ཕུད་ཚུལ་དང་ཇི་ལྟར་ལྟེབ་ཚུལ།

 ༡༣) སྣམ་སྦྱར་ལྟེབ་བཞིན་པའི་བརྙན་པར།

 ༡༤) དགེ་སློང་རྣམས་ནས་འདུལ་བ་དང་མཐུན་པའི་ཆོས་གོས་ཇི་ལྟར་ཐོགས་ཚུལ་དང་། དེ་ཡང་ཐོག་མར་གདིང་བ་བལྟབས་ཏེ་ཕྲག་པ་གཡོན་ལ་གཟར་དགོས། དེ་རྟིང་ཆོས་གོས་ལྟེབ་སྟེ་གདིང་བའི་སྟེང་དུ་འགེལ་དགོས། དེ་མཇུག་སྔོན་ནས་བསྒྲིལ་བའི་སྣམ་སྦྱར་དེ་ཉིད་ལག་ངར་གཡོན་དུ་ཐོགས་དགོས།

 ༡༥) གྲྭ་བཙུན་རྣམས་ས་གཞིར་འཁོད་སྐབས་ཆོས་གོས་འོག་ནས་གདིང་བ་དལ་གྱིས་ཇི་ལྟར་དབྱུང་ཚུལ།

 ༡༦) རྡོར་གདན་བྱང་ཆུབ་མཆོད་རྟེན་ཆེན་མོར་དགེ་སློང་རྣམས་བཀའ་འགྱུར་ཆོས་སྐོར་དུ་བྱོན་སྐབས་གླེགས་བམ་ཕྲག་པ་གཡོན་དུ་ཇི་ལྟར་ ཐོགས་ཚུལ་དང་། ལག་གཡས་ཀྱིས་ཇི་ལྟར་སྐྱོར་ཚུལ་གྱི་བརྙན་པར།

 ༡༧) རྒྱལ་བའི་བཀའ་འགྱུར་གྱི་ཕྱག་དཔེ་རྣམས་དད་གུས་དང་ལྡན་པའི་སྒོ་ནས་ཇི་ལྟར་འགྲེམས་ཚུལ་དང་ལེན་ཚུལ་གྱི་སྦྱོང་བརྡར།

 ༡༨) དགེ་སློང་རྣམས་ནས་བསོད་སྙོམས་ཀྱི་ལྗོངས་རྒྱུར་ཇི་ལྟར་ཆ་ཤས་ལེན་ཚུལ་དང་། ལྷུང་བཟེད་ཇི་ལྟར་ཐོགས་ཚུལ། དེ་ཡང་ལྷུང་བཟེད་ལག་གཡོན་གྱི་ལག་མཐིལ་དུ་བཞག་སྟེ་ལག་གཡས་ཀྱིས་ཇི་ལྟར་སྐྱོར་ཚུལ་སོགས་ཀྱི་སྦྱོང་བརྡར་ཚུལ་བཞིན་བགྱིས།