ཕྱི་ལོ་ ༢༠༡༧ ཟླ་ ༢ པའི་ ཚེས་ ༡༨ ཉིན། ཕྱི་དྲོ་དུས་ཚོད་ལྔ་པའི་ཐོག་དབུ་འཛུགས་ཀྱིས་སྲོད་ཀྱི་དུས་ཚོད་བརྒྱད་པའི་བར་ཡོངས་དགེ་གཏེར་སྒར་དགོན་གྱི་སྒོ་མཆོར་མདུན་དུ་སྔར་རྒྱུན་ལྟར་དཔལ ༸རྒྱལ་དབང་ཀརྨ་པ་མཆོག་དབུ་བཞུགས་ཀྱིས། སྔོན་ནས་མི་འཁྲུགས་པའི་བསྙེན་མཚམས་སུ་བཞུགས་ཟིན་པ་རྣམས་དང་ལྷན་དུ་དུས་ཡུན་ཆུ་ཚོད་གསུམ་ལྷག་ཙམ་རིང་མི་འཁྲུགས་པའི་ཆོ་ག་དང་འབྲེལ་བའི་སྒོ་ནས་གཤིན་པོ་རྣམས་ལ་རྗེས་འཛིན་གྱི་ཐུགས་སྨོན་གྱི་མཚམས་སྦྱོར་དྲག་པོ་དང་བཅས་དགོན་པའི་མདུན་ཕྱོགས་སུ་བྱང་ཤོག་སྲེག་པར་མཛད། དེ་ཡང་མགོན་པོ་མི་འཁྲུགས་པ་ནི། མདོ་སྡེ་དཀོན་མཆོག་བརྩེགས་པའི་ནང་མི་འཁྲུགས་པའི་ཞིང་བཀོད་ཀྱི་མདོ་ཞེས་པ་ཞིག་ཡོད། ཉེ་བའི་ལོ་ཤས་ནང་མི་འཁྲུགས་པའི་ཆོ་ག་ལ་ཆེས་དྭང་ཞེན་ཆེ་བ་བྱུང་བས་མི་འཁྲུགས་པའི་བསྙེན་མཚམས་བགྱིས་ཤིང་། དེ་དང་ཆབས་ཅིག་མི་འཁྲུགས་པའི་ཆོས་འཁོར་ཡང་ལོ་བསྟར་ཆགས་སུ་མཛད་བཞིན་པ་ཡིན།

དེང་དུས་རབས་ཉེར་གཅིག་པ་རྫས་མཚོན་དང་འཕྲུལ་ཐབས་དང་འབྲེལ་བའི་དུས་རབས་ཡིན་སྟབས་སྣོད་བཅུད་ཀུན་ལ་སྔར་དང་མི་མཚུངས་པའི་དོ་ཕོག་ཆེན་པོ་དང་གནོད་འཚེ་ཆེན་པོ་འབྱུང་བཞིན་པར། མགོན་པོ་མི་འཁྲུགས་པ་འདི་ཉིད་ལས་སྒྲིབ་སྦྱོང་བ་ལ་མཆོག་ཏུ་བསྔགས་པ་ཡིན་པས། དེ་ཉིད་ཀྱི་ཕྱིར་ན་མགོན་པོ་མི་འཁྲུགས་པའི་སྒོ་ནས་བྱང་སྲེག་མཛད་པའི་གནས་ཚུལ་སྙིང་བསྡུས་སུ།                                                                                                                བསྟན་འཛིན་རྣམ་རྒྱལ་ནས།